ಬೆಂಗಳೂರು, ಮೇ 25: ಇಂಡಿಯನ್ ಪ್ರೀಮಿಯರ್ ಲೀಗ್ (IPL 2026) ಇತಿಹಾಸದಲ್ಲಿ ಅನುಭವಿ ಬ್ಯಾಟರ್ Manish Pandey ಮತ್ತೊಂದು ಮಹತ್ವದ ಮೈಲುಗಲ್ಲು ತಲುಪಿದ್ದಾರೆ. ಕೋಲ್ಕತ್ತಾ ನೈಟ್ ರೈಡರ್ಸ್ ಪರ ಆಡುತ್ತಿರುವ ಮನೀಷ್ ಪಾಂಡೆ ಐಪಿಎಲ್ನಲ್ಲಿ ತಮ್ಮ 4000 ರನ್ಗಳನ್ನು ಪೂರ್ಣಗೊಳಿಸುವ ಮೂಲಕ ವಿಶೇಷ ಸಾಧನೆ ಮಾಡಿದ್ದಾರೆ.
ದೆಹಲಿ ಕ್ಯಾಪಿಟಲ್ಸ್ ವಿರುದ್ಧ ನಡೆದ ಪಂದ್ಯದಲ್ಲಿ ಮನೀಷ್ ಪಾಂಡೆ ಕೇವಲ 16 ಎಸೆತಗಳಲ್ಲಿ 25 ರನ್ಗಳ ಚುರುಕಿನ ಇನ್ನಿಂಗ್ಸ್ ಆಡಿದರು. ಈ ವೇಳೆ ಅವರು ಐಪಿಎಲ್ನಲ್ಲಿ 4000 ರನ್ಗಳ ಗಡಿ ದಾಟಿದರು. ಈ ಸಾಧನೆ ಮಾಡಲು ಅವರಿಗೆ 164 ಇನ್ನಿಂಗ್ಸ್ಗಳು ಬೇಕಾಯಿತು. ಇದರಿಂದ ಐಪಿಎಲ್ ಇತಿಹಾಸದಲ್ಲಿ 4000 ರನ್ಗಳನ್ನು ಅತ್ಯಂತ ನಿಧಾನವಾಗಿ ಪೂರ್ಣಗೊಳಿಸಿದ ಮೂರನೇ ಆಟಗಾರ ಎಂಬ ದಾಖಲೆಯೂ ಅವರ ಹೆಸರಿಗೆ ಸೇರಿದೆ.
ಐಪಿಎಲ್ನಲ್ಲಿ 4000 ರನ್ಗಳನ್ನು ಹೆಚ್ಚು ಇನ್ನಿಂಗ್ಸ್ಗಳಲ್ಲಿ ಪೂರೈಸಿದವರ ಪಟ್ಟಿಯಲ್ಲಿ Dinesh Karthik ಮೊದಲ ಸ್ಥಾನದಲ್ಲಿದ್ದು, ಅವರು 188 ಇನ್ನಿಂಗ್ಸ್ ತೆಗೆದುಕೊಂಡಿದ್ದರು. ನಂತರ Ambati Rayudu 169 ಇನ್ನಿಂಗ್ಸ್ಗಳಲ್ಲಿ ಈ ಸಾಧನೆ ಮಾಡಿದ್ದರು. ಇದೀಗ ಮನೀಷ್ ಪಾಂಡೆ 164 ಇನ್ನಿಂಗ್ಸ್ಗಳಲ್ಲಿ ಈ ಮೈಲುಗಲ್ಲು ತಲುಪಿದ್ದಾರೆ.
36 ವರ್ಷದ ಮನೀಷ್ ಪಾಂಡೆ 2008ರಿಂದಲೇ ಐಪಿಎಲ್ನಲ್ಲಿ ನಿರಂತರವಾಗಿ ಆಡುತ್ತಿರುವ ಕೆಲವೇ ಕೆಲ ಆಟಗಾರರಲ್ಲಿ ಒಬ್ಬರು. Virat Kohli ಮತ್ತು Rohit Sharma ಜೊತೆಗೆ ಐಪಿಎಲ್ ಆರಂಭವಾದ ಪ್ರತೀ ಸೀಸನ್ನಲ್ಲಿ ಆಡಿದ ಆಟಗಾರರ ಪಟ್ಟಿಯಲ್ಲಿ ಅವರೂ ಸೇರಿದ್ದಾರೆ.
ಮನೀಷ್ ಪಾಂಡೆ ಅವರ ಐಪಿಎಲ್ ಪಯಣ ಹಲವು ತಂಡಗಳೊಂದಿಗೆ ಸಾಗಿದರೂ, ಕೋಲ್ಕತ್ತಾ ನೈಟ್ ರೈಡರ್ಸ್ ಪರ ಅವರು ನೀಡಿದ ಕೊಡುಗೆ ವಿಶೇಷವಾಗಿದೆ. 2014ರ ಐಪಿಎಲ್ ಫೈನಲ್ನಲ್ಲಿ ಪಂಜಾಬ್ ವಿರುದ್ಧ ಆಡಿದ 94 ರನ್ಗಳ ಮ್ಯಾಚ್ ವಿನ್ನಿಂಗ್ ಇನ್ನಿಂಗ್ಸ್ ಇಂದಿಗೂ ಅಭಿಮಾನಿಗಳ ಮನಸ್ಸಿನಲ್ಲಿ ಉಳಿದಿದೆ. ಆ ಪಂದ್ಯದಲ್ಲಿ ಅವರ ಪ್ರದರ್ಶನದ ನೆರವಿನಿಂದ ಕೆಕೆಆರ್ ಚಾಂಪಿಯನ್ ಆಗಿತ್ತು.
ಇದರ ಜೊತೆಗೆ, ಐಪಿಎಲ್ ಇತಿಹಾಸದಲ್ಲಿ ಶತಕ ಸಿಡಿಸಿದ ಮೊದಲ ಭಾರತೀಯ ಬ್ಯಾಟರ್ ಎಂಬ ಹೆಗ್ಗಳಿಕೆಯೂ ಮನೀಷ್ ಪಾಂಡೆ ಅವರದ್ದೇ. 2009ರಲ್ಲಿ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ಪರ ಆಡುತ್ತಿದ್ದಾಗ ಅವರು ಈ ಸಾಧನೆ ಮಾಡಿದ್ದರು.
ಈ ಸೀಸನ್ನಲ್ಲಿ ಕೆಕೆಆರ್ ಪರ ಮಧ್ಯಮ ಕ್ರಮಾಂಕದಲ್ಲಿ ಸ್ಥಿರ ಪ್ರದರ್ಶನ ನೀಡುತ್ತಿರುವ ಮನೀಷ್ ಪಾಂಡೆ ಬಗ್ಗೆ ಸಹಾಯಕ ಕೋಚ್ Shane Watson ಕೂಡ ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ. “ಇತ್ತೀಚಿನ ವರ್ಷಗಳಲ್ಲಿ ನಾನು ಕಂಡ ಅತ್ಯುತ್ತಮ ಮನೀಷ್ ಪಾಂಡೆ ಇದೇ. ತಂಡಕ್ಕೆ ಅನುಭವ ಮತ್ತು ಶಕ್ತಿ ಎರಡನ್ನೂ ನೀಡುತ್ತಿದ್ದಾರೆ,” ಎಂದು ವಾಟ್ಸನ್ ಹೇಳಿದ್ದಾರೆ.
ಮನೀಷ್ ಪಾಂಡೆ ಈಗಾಗಲೇ ಐಪಿಎಲ್ನಲ್ಲಿ 1 ಶತಕ ಹಾಗೂ 22 ಅರ್ಧಶತಕಗಳನ್ನು ದಾಖಲಿಸಿದ್ದು, 4000ಕ್ಕೂ ಅಧಿಕ ರನ್ಗಳೊಂದಿಗೆ ಲೀಗ್ನ ಅನುಭವಿ ಬ್ಯಾಟರ್ಗಳಲ್ಲಿ ಒಬ್ಬರಾಗಿ ಮುಂದುವರಿದಿದ್ದಾರೆ.